कॉन्स्टेबलचे दुहेरी कर्तव्य; मित्राच्या मोटारीचे अॅम्ब्युलन्समध्ये रूपांतर | Marathi News Headlines, मराठी बातम्या हेडलाइन्स ...

• कॉन्स्टेबलचे दुहेरी कर्तव्य; मित्राच्या मोटारीचे अॅम्ब्युलन्समध्ये रूपांतर | 

करोनाच्या संकटात कर्तव्य बजावताना राज्यामध्ये दोन हजारांहून अधिक पोलिसांना या विषाणूची लागण झाली असून, २७ पोलिसांचा मृत्यू झाला आहे. अशा परिस्थितीत पोलिस न डगमगता आपले कर्तव्य चोख बजावत आहेत.

 मुंबई
करोनाच्या संकटात अहोरात्र जीव धोक्यात घालून लढणारे पोलिस आपापल्या परीने रुग्णसेवाही करीत असल्याचे समोर आले आहे. रुग्णवाहिकांअभावी होणारे रुग्णांचे हाल पाहून कफ परेड पोलिस ठाण्यातील कॉन्स्टेबल तेजस सोनावणे यांनी त्यावर उपाय शोधला आहे. मित्राच्या मारुती ओम्नी गाडीचे रूपांतर त्यांनी रुग्णवाहिनीत केले आहे. पोलिस ठाण्यात कर्तव्य बजावतानाच झोपडपट्टीतील गरीब, गरजूंना दवाखाना, रुग्णालयात मोफत सोडण्याची व्यवस्थाही ते करीत आहेत.
करोना संकटात कर्तव्य बजावताना राज्यामध्ये दोन हजारांहून अधिक पोलिसांना या विषाणूची लागण झाली असून, २७ पोलिसांचा मृत्यू झाला आहे. अशा परिस्थितीत पोलिस न डगमगता आपले कर्तव्य चोख बजावत आहेत. कफ परेड पोलिस ठाण्यातील कॉन्स्टेबल तेजस सोनावणे आपल्या कार्यालयाबाहेर उभे असताना त्यांना याबाबतची समस्या प्रथम जाणवली. काही रुग्णांना बराच वेळ रुग्णवाहिकांसाठी ताटकळत उभे राहावे लागत असल्याचे त्यांना दिसले. अशा रुग्णांच्या मदतीसाठी काही तरी करावे असा विचार करीत असतानाच एका मित्राकडे मारुती ओम्नी कार असल्याचे त्यांच्या लक्षात आले. त्यांनी मित्राकडून ही कार घेतली. यामध्ये स्वतःच्या खिशातील पैसे खर्च करून ते इंधन भरतात. आपल्या कामाचे तास पूर्ण केल्यानंतर तेजस रुग्णसेवा सुरू करतात.

तेजस सोनावणे यांनी गेल्या बुधवारपासून रुग्णसेवा सुरू केली आहे. कफ परेड पोलिस ठाण्याजवळच त्यांची ही ओम्नी अॅम्ब्युलन्स उभी असते. आत्तापर्यंत सोनावणे यांनी सहा ते सात रुग्णांना जवळील रुग्णालयात पोहोचवल्याने त्यांच्यावर वेळेत उपचार झाले. सोनावणे हे कुलाबा परिसरात राहतात. पोलिस दलात असल्याने आपल्यामुळे संसर्ग होऊ नये यासाठी त्यांनी दोन मुलींना गावाला पाठविले.
चोख कामगिरीची चर्चा
सोनावणे यांच्या निस्वार्थी अॅम्ब्युलन्स सेवेची कुलाबा कफ परेड परिसरात चर्चा असून, गरजू, गरीब रुग्णांचे नातेवाईक, शेजारी मदतीसाठी स्वतःहून संपर्क साधतात. पोलिस दलातील आपल्या चोख कामगिरीबद्दल सोनावणे नेहमीच प्रकाशझोतात असतात. मरिन ड्राइव्ह पोलिस ठाण्यात कर्तव्यावर असताना त्यांनी समुद्रात पडलेल्या महिलेला वाचवले होते. या कामगिरीबद्दल सोनावणे यांना जीवन रक्षा पदकाने सन्मानित करण्यात आले होते.