सवलतींसह लॉकडाउनमध्ये वाढ; CM उद्धव ठाकरेंचे सूतोवाच
 |
सवलतींसह लॉकडाउनमध्ये वाढ; CM उद्धव ठाकरेंचे सूतोवाच
'करोनाची आकडेवारी पाहून हे संकट आटोक्यात आले आहे, असे वाटत असले तरीही येत्या १५ दिवसांमध्ये आणखी काळजी घेण्याची गरज आहे,' असे प्रतिपादन मुख्यमंत्री उद्धव ठाकरे यांनी शुक्रवारी केले.
'करोनाची आकडेवारी पाहून हे संकट आटोक्यात आले आहे, असे वाटत असले तरीही येत्या १५ दिवसांमध्ये आणखी काळजी घेण्याची गरज आहे,' असे प्रतिपादन मुख्यमंत्री उद्धव ठाकरे यांनी शुक्रवारी केले. त्याचबरोबर एक जूनपासून लॉकडाउनचा कालावधी आणखी वाढवावा लागणार असल्याचे सूचित करतानाच त्यांनी त्यामध्ये काही सवलती देण्याचा विचार करता येईल, असेही सांगितले. त्याचबरोबर श्रमिकांचे स्थलांतर करण्यामध्ये राज्य सरकारची बरीच शक्ती वाया गेल्याचे सांगून, त्यांनी याबाबतच्या निर्णयांवर प्रश्नचिन्ह उपस्थित केले.
करोनाचे संकट सुरू झाल्यानंतर प्रथमच मुख्यमंत्र्यांनी प्रसिद्धी माध्यमांतील निवडक संपादकांशी शुक्रवारी संवाद साधला. यावेळी राज्याचे उद्योगमंत्री सुभाष देसाई, राज्याचे मुख्य सचिव अजोय मेहता आणि मुंबईचे महापालिका आयुक्त इक्बाल चहल उपस्थित होते. सुरुवातीला मेहता व चहल यांनी राज्यातील आणि मुंबईतील सध्याचे रुग्ण, उपलब्ध असलेल्या सुविधा, नव्याने तयार होत असलेल्या सुविधा यांची माहिती दिली. त्याचबरोबर महात्मा फुले योजनेचा लाभ आता राज्यातील बहुतेक सर्वांना मिळणार असल्याने सर्वांना उपचार मिळतील, असेही सांगितले. चहल यांनी याबाबतच्या आकडेवारीचे विश्लेषण करण्याची गरज असल्याचे सांगितले. दररोज करोनाची लागण झालेल्या रुग्णांचा आकडा बघून छाती दडपून जात असली तरीही त्यामध्ये बरे झालेल्या, कोणतीही लक्षणे दिसत नसल्यामुळे घरी राहून उपचार घेणाऱ्या रुग्णांचाही समावेश असतो. त्यामुळे प्रत्यक्षात उपचारांची गरज असलेल्या रुग्णांचा आकडा हा कमी असतानाही त्यामुळे चुकीचे मत तयार होते, असे चहल यांनी सांगितले.
यावर बोलताना मुख्यमंत्र्यांनी सांगितले, 'हा आकडा एकदम कमी झालेला नाही. सरकारने गेले दोन महिने घेतलेल्या अथक परिश्रमांमुळे हा आकडा कमी करण्यात यश आले आहे. पण या यशाने हुरळून जाण्यासारखी स्थिती नाही. येत्या १५ दिवसांमध्ये स्थलांतरामुळे नक्की काय परिणाम झाला आहे, याचा नेमका अंदाज येईल. त्यानंतरच काही तरी ठोस निष्कर्ष काढणे शक्य होईल.' येत्या १५ दिवसांमध्ये सगळ्यांनीच काळजी घेणे आवश्यक असल्याचे सांगून, त्यांनी लॉकडाउनचा कालावधी आणखी वाढवावा लागणार असल्याचे स्पष्ट केले.
केंद्र सरकारने याबाबत निर्णय जाहीर केल्यानंतर राज्य सरकार आपली नियमावली तयार करेल व त्यामध्ये याबाबतचे धोरण स्पष्ट होईल. करोनाची नक्की आकडेवारी उपलब्ध होत नसल्याचे सांगितल्यावर मुख्यमंत्र्यांनी याबाबत कोणतीही आकडेवारी लपवून ठेवायची नाही, असे आदेश मुख्य सचिव व महापालिका आयुक्तांना दिले. त्याचप्रमाणे करोनाची लक्षणे दिसू लागताच तातडीने वैद्यकीय सल्ला घेण्याची गरज असल्याचेही प्रतिपादन त्यांनी केले. या सगळ्या प्रक्रियेमध्ये रुग्ण वेळेत रुग्णालयापर्यंत पोहोचणे अत्यंत आवश्यक असल्याचे लक्षात आले आहे, असे सांगतानाच त्यांनी समाजातील सर्व घटकांनी ही बाब लक्षात घेणे आवश्यक असल्याचेही प्रतिपादन केले.
श्रमिकांच्या स्थलांतराच्या बाबतीत राज्य सरकारची खूप शक्ती वाया गेल्याचे सांगतानाच त्यांनी हा शक्तिपात टाळता आला असते तर बरे झाले असते, असेही सुचविले. याबाबत घेतल्या गेलेल्या निर्णयाबाबत ठाकरे असमाधानी असल्याचे त्यातून जाणवले.
'युती कोणाचीही, कोणाबरोबर होऊ शकते'पावसाळा सुरू झाल्यानंतर करोनाची युती डेंग्यूसारख्या रोगाबरोबर झाली तर स्थिती आणखी बिघडेल, असे सांगतानाच मुख्यमंत्री उद्धव ठाकरे सध्या कोणाचीही युती कोणाशीही होऊ शकते, हे सांगण्यास विसरले नाहीत. पावसाळ्यामध्ये यंत्रणांवर आणखी ताण येऊ नये यासाठी सगळ्यांनी खबरदारी घेणे आवश्यक असल्याचेही मुख्यमंत्र्यांनी सांगितले.
करोनाबरोबर जगायचे म्हणजे नक्की काय करायचे?'
सध्या सगळेच जण करोनाबरोबर जगणे आवश्यक असल्याचे सांगत आहेत; पण तसे करायचे म्हणजे नक्की काय करायचे याचे लोकशिक्षण देण्याची गरज असल्याचे सांगून, मुख्यमंत्री ठाकरे यांनी यात माध्यमांनी सरकारला सहकार्य करण्याची विनंती केली.
वृत्तपत्र वितरणाबाबत निर्णय लवकरच
वर्तमानपत्रे घरोघर पोहचविण्यास परवानगी देण्याबाबत राज्य सरकार गंभीरपणे विचार करीत असून, लवकरच याबाबतचा निर्णय घेण्यात येईल, असेही त्यांनी शेवटी सांगितले.
राज्यात ११६ बळी
राज्यात ११६ करोनाबाधित रुग्णांचा शुक्रवारी मृत्यू झाला असून २६८२ नव्या रुग्णांची नोंद झाली आहे.
शुक्रवारी एकाच दिवशी ८ हजार ३८१ बरे झालेल्या रुग्णांना घरी सोडण्यात आले असून त्यातील सर्वाधिक ७ हजार ३५८ रुग्ण मुंबई महापालिका क्षेत्रातील आहेत.
इतक्या मोठ्या संख्येने रुग्ण बरे होऊन घरी सोडण्याची ही पहिलीच वेळ आहे.
तर सध्या ३३ हजार १२४ रुग्णांवर उपचार सुरू आहेत, अशी माहिती आरोग्यमंत्री राजेश टोपे यांनी दिली.
शुक्रवारी मृत्यू झालेल्या रुग्णांपैकी मुंबई ३८, ठाणे १, भिवंडी ३, नवी मुंबई ९, रायगड २, मिरा-भाईंदर ३, पनवेल १, कल्याण-डोंबिवलीच्या एका रुग्णाचा समावेश आहे.
No comments:
Post a Comment